خواطر - تنشيط السياحة

خلال اﻷزمة اﻹقتصادية فى أمريكا مركز غطس كان بيخسر فصاحب المركز عمل ايه عشان يعالج خسارته؟!
طبعا لو هو مصرى أو أجنبى عايش فى مصر بقاله فترة طويلة كان حيخفض المرتبات ويصفى لبعض الموظفين لكنه قال Let us have fun!
وبدأ يزود خسايره عن طريق عمل حفلات شوى وسهر ومشروبات وعروض غطس ببلاش قبل نهاية سنة كان مكسبه 1% بدل خسارة 20%
مركز غطس تانى فى أمريكا فى كورسات معينة المدربين ماكانوش بيبعوها صاحب المركز كل ما يتكلم مع المدربين عشان يبيعوها يردوا أن الزباين مش بيرضوا عمل ايه عشان يزود ...المبيعات للكورسات دى؟!
عمل اجتماع مع المدربين قالهم اللى حيبيع الكورسات دى حياخد هو تمن الكورس كامل مش العمولة بس!
طبعا المدربين فرحوا وبدأت المبيعات تزيد بعد 6 شهور بيشوف اﻹحصاءات لاقى الكورسات اللى ماكانتش بتتباع بقت أعلى من الكورسات العادية راح عامل اجتماع للمدربين ووراهم اﻹحصاءات وقالهم من بكره اللى حيبيع الكورسات حياخد عمولته بس ولو المبيعات قلت حتمشوا عشان اتضح إنكم أنتم اللى ماكنتوش بسوقوا الكورسات دى غير لما خدتم تمنها كامل بدون ما المركز ما يغطى حتى تكاليفه!

تجربة تالتة حصلت فى شرم فندق كورال باى تقريبا من سنة أو اتنين مش فاكر بالظبط عمل اتفاق مع شركة إيزى جيت إن اﻹيطالى اللى حيحجز روما شرم شرم روما والتذكرة كانت تقريبا 150 يورو حياخد أسبوع إقامة شاملة الفطار ببلاش خلال نص يوم تم حجز عدد كبير من الغرف الحسبة بتقول كده كده فى تكلفة ثابتة مرتبات وخلافه الناس اللى حتيجى ده لما ترجع بعد ما تشوف شرم حتحكى الوضع اﻷمنى عامل إزاى خاصة إن إيطاليا كانت عاملة حظر وحتحكى عن الفندق اللى كانوا فيه ولما يحبوا يرجعوا تانى نسبة كبيرة منهم حتنزل فى نفس الفندق هات بقى مستثمر مصرى من اللى واخدين اﻷرض بسعر قليل وعنده إعفاء ضريبى لايقل عن 10 سنين وقوله ايه رأيك تعمل حملة ترويجية للسياحة بنفس الشكل؟!
حيقولك يفتح الله!
ليه؟!
ﻷن عندنا مفيش مفهوم الخسارة السائد البحث عن المكسب بغض النظر المكسب ده على حساب مين عمال موظفين....إلخ؟!
عندنا النظر دايما تحت الأقدام زائد إن أصحاب المشاريع مش بيديروا المشاريع دى حب فيها لا ...دول عاملين زى اللى كان عنده فرخة بتبيض له كل يوم بيضة دهب فطمع وراح دابح الفرخة عشان ياخد البيض كله
الخسارة أحيانا مكسب على المدى البعيد!
الخسارة طريق ﻹبتكار حلول وأفكار جديدة!
الخسارة بداية جديدة!