بما إن الأحداث المصرية ساخنة هذه الأيام فلا تخلو أحاديث البيوت المصرية من تناول الأحداث وفيما يلى سيناريو لبعض هذه الأحاديث :
قبل الإنتخابات
أنا : حاتنتخبوا مين؟
أختى : مرسى
ماما : حابطل صوتى عشان محدش فيهم كويس
بابا : شفيق
أنا : شفيق ايه يابابا أنت مش كنت مع الثورة
بابا : أنا والله فرحت بالثورة بس أنا عايز استقرار
أنا : ماهو استقرار القاع اسمه استقرار
بابا: احنا عايزين البلد تهدى بقى وأنا متضرر من اللى بيحصل
أنا : متضرر إزاى؟!
بابا : ما أنت عارف البيت اللى بنأجره إيجاره تعبان
أنا : يا سلام ما أنا مرتبى نقص النص لمدة أربع شهور ومفيش زيادة سنوية كمان يعنى كلنا متضررين
بابا: فى ناس مش لاقيه تاكل والناس دى لو خرجت البلد حاتخرب
أنا : ما فوز شفيق حيخربها
بابا: ماهو تعلم الدرس ثم الإخوان عاوزين يكوشوا على كل حاجة
أنا : ما مجلس الشعب اتحل ومعدش معاهم حاجة
بابا : لا الإخوان دول يستاهلوا أكتر من كده
أنا: ليه؟
بابا : كنت مستنى منهم حاجات كتير ومعملوش حاجة
أنا : معاك بس ما انتخبش شفيق ابطل صوتك أحسن
بابا: هى دى الديمقراطية اللى أنتم عايزينها؟!
أنا: عامة ياعم الحاج احنا حنطبق الديمقراطية وحنتقبل نتيجتها حتى لو كانت على حساب مصلحتنا! حأقول ايه جيل ظلمنا بسكوته جاي يقتلنا بصوته ! لنا الله !
بعد الإنتخابات
أختى : هم ليه مش عاوزين يعلنوا نتيجة الإنتخابات؟ماما: أصلهم بيقولوا حيأمنوا المحافظات الأول قبل إعلان النتيجة !
أختى : زمايلى فى الشغل بيقولوا إن الطريق - شرم النفق - حيتفقل والبنوك سحبت الفلوس من ماكينات الصرافة
ماما : ده بيقولوا إن فى ناس بتخزن تموين وأكل كمان عشان شكلها كده شفيق اللى فاز والإخوان حيولعوا فى البلد
أنا : هو مين اللى بيقولوا؟
ماما : الناس والتليفزيون! ماهو الإخوان معاهم سلاح
أنا : الناس والتليفزون هم اللى بيقولوا كده؟!
ماما : أيوه أومال الأسلحة اللى بيمسكوها كل شوية من جايه من ليبيا دى ايه؟!
أنا : طيب يا ماما ممكن تجاوبينى على السؤال ده مين المفروض بيحرس الحدود؟!
ماما : الجيش
أنا: طيب فين المخابرات وأمن الدولة سابقا - الأمن الوطنى حاليا- والجيش؟!
ماما : موجودين
أنا : طيب ليه ما مسكوش الإخوان متلبسين بالسلاح؟!
ماما : أنا عارفه بقى !
أختى : أنت مجاوبتش ليه على موضوع نتيجة الإنتخابات؟
أنا : يا ستى المفروض طبقا للقانون النتيجة تعلن خلال 72 ساعة إنما بجاتو امبارح قال ممكن تتأجل للسبت أو الأحد
أختى : طيب ليه التأجيل؟
أنا : واضحة كل ما الوقت زاد كل ما اللعب فى النتيجة ممكن يحصل
ماما : أنت ليه شايف كده هو مش فيه 400 طعن ومحتاجين وقت
أنا : ياماما فى تركيا النتيجة بتظهر بعد نهاية الإنتخابات بساعتين تلاتة وبكده ميكنش فى مجال للعب
ماما: ماهو مرسى مزور فى المطابع الأميرية
أنا :يا حاجة هى المطابع الأميرية دى مين بيديرها؟
ماما : الحكومة !
أنا : إزاى بقى مرسى حيخلى الحكومة تزور له مش كده لو فى تزوير يبقى لصالح شفيق؟!
ماما : آه المفروض بس بيقولوا خيرت الشاطر دفع 10 مليون!
أنا : يعنى ياماما خيرت دفع لناس فى الحكومة الفلوس دى من غير مافى عصفورة واحدة بلغت المجلس العسكرى؟! والشعب عندنا أساتذة فى الإبر والآسافين؟!
ماما : معرفش هم اللى بيقولوا
أنا : ماهى دى المشكلة إننا بنسمع ومنفكرش فى اللى بيتقال
ماما : أنت مش كنت بتهاجم الإخوان ايه اللى حصل؟!
أنا : ولسه بهاجمهم الموضوع موضوع طريقة تفكير إزاى نردد اللى بيتقالنا من غير ما نفكر فيه؟! حأقلك على حاجة عدد الناس فى سيناء كلها كام؟!
ماما : يجى 300 ألف
أنا : طيب صعب على الجيش أن يسيطر على سيناء واللى فيها ؟!
ماما : لا سهل إنه يعمل كده
أنا : طيب ممكن تقولي لى ليه بيحصل حوادث قطع للطريق أوسرقة لعربيات الشحن على طريق شرم النفق؟!
ماما : ما أصل الجيش مشغول باللى بيحصل فى البلد عشان إسرائيل ناشرت قوات على الحدود
أنا : طيب حامشى معاك اللى عايز يحمى البلد ينشر قواته جوه البلد ويحل مجلس الشعب ويعلن إصدار إعلان دستورى جديد ولا يخلى كل حاجة زى ماهية ويركز مع الحدود؟!
ماما : لا يركز مع الحدود بس إسرائيل عامله كده عشان مرسى
أنا : إسرائيل من أول الثورة وهى ناشرة قوات وبتبنى سور على الحدود ثم سؤال إسرائيل تحب مين يفوز مرسى ولا شفيق
ماما : شفيق
أنا : طيب لو هى عايزة تأثر على الناس فى الإنتخابات تعمل ايه؟
ماما : تنشر قوات عشان الناس تنتخب شفيق!
أنا : الله ينور عليك يبقى بقى مش كل حاجة تتقال نرددها منغير ما نفكر فيها صح ولا ايه؟!
ماما : تعرف ياريتهم ينقلبوا ويريحونا من الوش ده
أنا : يا حلاوة هم بكده يريحونا من الوش
ماما : أيوه
أنا : يازين ما ربيت يا مبارك ! شفيق كان عنده حق شعب الوديان سهل المعشر والإنقياد
ماما : ماهو اللى رباهم هم اللى ربوك !
أنا : ياماما مقصدش والله ! أنا أقصد إن الشعب بيحب يريح دماغه مش عايز يتعب نفسه ويفكر عشان ماتعودش تصدقى ياماما أحنا قدامنا مشوار طويل قوى عشان نعرف نغير طريقة تفكير الناس
ماما : مش حتعرفوا الناس اتعودت على كده
أنا : لا نقدر بس محتاجين وقت وعدد كبير ومجهود أكبر واللى بيحصل من أحداث مش مخلى حد يقدر يتلفت حوليه
*******************
الحوارات السابقة تلخص المشاكل الجوهرية بين طريقة تفكيرنا وطريقة تفكير أهالينا ويبين الجوانب السلبية أيضا فى طريقة حوارنا معهم
