الاثنين، 18 أبريل، 2011

عايز أتجوز 10- المستشفى


طبعا أتقدم بخالص الشكر لكل من شجعنى على الإستمرار فى كتابة هذا الموضوع
وأتقدم بخالص الإعتذار لكل من لم يجد ما يجذبه فى موضوعاتى
ناقص تقول
أشكر الذين قولا لا والذين أقول نعم
وتخص بالشكر الست نعيمة التى قالت نعماين
يا ابنى سيبك من الخط السياسى ده

ماعلينا
----------------------------------------------------------------------------
بعد كام شهر وفى إحدى المكالمات التليفونية التى تصل إلى الست الوالدة
كانت على الهاتف مدام إعتماد زميلة والدى فى العمل ولكنها تعمل بطور سيناء
مدام إعتماد : ايه يا أم سامح مش حنفرح بسامح بقى ولاايه؟
ماما: والله يا ما نفسى ياختى أخلص منه بقى
العيال ياختى متبيتين فى البيت محدش عاوز يتزحزح
ايه ده؟
مدام إعتماد : طب أنا عندى ليكى عروسة زى القمر
ماما : بجد ودى تبقى مين ان شاء الله؟
مدام إعتماد : تبقى بنت واحدة زميلتنا فى المديرية
أدب ايه وأخلاق ايه
ماما : بس أنتى تعرفيهم كويسة؟
مدام إعتماد : أكيد يعنى انا حجيبلكم حد معرفوش
هى اسمها سارة وخريجة حقوق
 وبتشتغل فى مكتب محامى هنا فى الطور
ماما : والبنت بقى جميلة ولا لا
أصل زى ما أنت عارفه الواد بيشتغل مع أجانب
وهم معظمهم حلوين فاحنا عايزين واحدة
تبقى حلوة فى عيناه عشان عيناه ماتزغللش بره
مدام إعتماد : ده زى القمر
ماما : خلاص نبقى نشوفها بس دى حنشوفها ازاى
عشان سامح معدش راضى أنه يروح يشوف أى بنت فى بيتها؟
مدام إعتماد : سيبينى يومين تالتة وربنا يسهل

وانتهت المكالمة التليفونية وبعد أربعة أيام جاء اتصال آخر من مدام إعتماد
وأبلغت أمى أن أم سارة ألسبوع القادم ستأتى لعمل بعض الفحوصات الطبية فى
مستشفى شرم الشيخ الدولى وسارة حتكون معاها
ومنعا لأى إحراج سامح ممكن يشوفها هناك
وافقت طبعا أمى على هذا الإقتراح
 وقبل حضور سارة ووالدتها بيومين
أبلغنى أبى بالموضوع
أنا : بس يا حج مش شايف أنه فأل وحش شويتين
يعنى اروح أشوف واحد فى المستشفى
ده أنا ما بطيقش المستشفيات أنت فاكر
لما عملت عملية فى الثانوية بمجرد
مافوقت من البنج روحت البيت على طول
بابا : يعنى نعمل لجانبك ايه ما أنت رافض أنك تزورهم فى البيت
 وكمان هم حيبقوا فى المستشفى ويبان الموضوع صدفة
 عجبتك أهلا وسهلا ما عجبتكش خلاص محدش يعرف حاجة
أنا : يعنى الست إعتماد ما قالتش لهم حاجة
بابا : أنا طلبت منها متقولش حاجة لحد ما تشوفها
أنا : طيب ده حيكون الصبح وأنا ببقى فى الشغل؟
بابا : خلاص قاعدة الصواريخ اللى أنت قاعدة جنبها
حيحصلها حاجة لما تغيب ساعة
أنا : ما أنت عارف ياحاج ممكن صاروخ ي
طلع هنا ولا هنا نوقع بلدين فى بعض
هههههههه
بابا : هههه والله طول ما أنت مقضيها هزار كده منتش مجوز 
أنا : يعنى يا حاج اللى اتجوز عمل ايه؟
بابا : واللى يابنى عندك حق

سمعنى أغنية ريكو زهقان طهقان مضايق حنيت لأيام العزوبية
احمم ما يصحش كده  وبعدين

أنا : خلاص حبقى استئذن ساعة
بابا : وأنا حاجى اعدى عليك

وفى اليوم الموعود حضر والدى وذهبت للمستشفى
مع والدتى وجلسنا فى انتظار سارة
وذهب والدى ليكون فى استقبال مدام إعتماد وسارة ووالدتها
 فى محطة شرق الدلتا بالرويسات وحضر بعد نصف ساعة
ولكن وجدت علامات عدم الرضا على وجه أبى
وعندما شاهدت سارة انتابنى نفس الشعور
وإحقاقا للحق البنت كانت شيك وبيضا
يعنى ينطبق عليها
ياريتنى كنت بيضا وبضب أصل البياض عند الجواز يتحب

 أتعيب المخلوق أم تعيب الخالق
مقولة أخى باسم  افتكرتها دلوقتى 
حاشا لله أن أعيب خلق الله
ولكن لم استرح لها ومن الجائز يكون
 لتأثير المكان أثر نفسى فى الموضوع

الخلاصة محصلش قبول ولم يريد الله أن تتطور الأمور عن ذلك
ولم أجلس معها أكثر من دقائق معضوضة
واستئذنت بالإنصراف لأعود لعملى

وبالليل جاء اتصال مدام إعتماد التى لاحظت عدم اهتمامى وسرعة انصرافى
وحمدت الله أنها استمعت لأبى ولم تبلغ البنت أو والدتها
--------------------------------------------------------------------------

عنوان حلقة الغد
 نزلة برد
ايوه محدش يستغرب
ممكن تعرف عروسة عن طريق نزلة برد
 أشوفكم غدا بإذن الله
********
تمت كتابة هذا الموضوع يوم 30/09/2010


تعليقات الأصدقاء على الحلقة
طارق: لا انسى مش حتفلت منى المرة دى كفاية اسمها ياعم الحاج ليه بتقول
وجدت علامات عدم الرضا على وجه أبى وعندما شاهدت سارة انتابنى نفس الشعور وليه محصلش نصيب أنا شايف إنك بتهرج وكان فى فرص بين ايديك

سامح: والله بص يا طروق ممكن تشوف حد تحس أنك تعرفه من زمان وناس أول ما تشوفها قلبك ينقبض دون سبب هى عملية ارتياح
بس أنا عن نفسى محسيتش الأمور ماشية غير فى موضوع أخت عماد بس الشقة اللى وقفت عائق ولو فى حد تانى الأمور كانت ممكنة أقول على فكرة أنا قولت معظم الأحداث بصراحة التغيير بس فى الشخصيات عشان تكون مبهمة حفاظا على الشخصيات الحقيقية

مى : شوية صبر على الناس

سامح: الصبر لو فى قبول وارتياح نفسى ساعتها ممكن اصبر على حاجات عشان فى اختلاف فى العقليات والتفكير والطباع والعادات و....إلخ إنما للأسف ممكن يكون عيب فيا لو مرتحتش لحد صعب قوى أنى اصبر عليه وسبحان الله القلوب بتبقى عند بعضها القلب للقلب رسول اعذرونى طبيعة صعب اغيرها

مى : عندك حق بتفرق من واحد للتانى ممكن الإنطباع الأولانى يكون مش كويس وبعدك كده فى التعامل اكتشف العكس

أسماء : صعب جداااا انك تكوني بتفكري في الأرتباط وان ده يكون شريك او شريكة حياتك ومترتاحيش ليه لما تشوفيه
التفكير بيبقي صعب شوية بتحسي انك مجبره تاخدي دواء وتحاولي تتعودي عليه وده من باب اولي ان الموضوع يتقفل
يعني مش كفاية الإرنباط هيكون بحد متعرفهوش خاااااااااالص لا كمان انك متكونيش مرتاحة؟؟؟؟؟
انا بتفق معاكي ان في ناس الإنطباع الأول بيكون غلط وممكن يتغير بس ده في التعاملات العادية مش في ارتباط

هو بصراحة يا سامح يا خويا مافيش حد ممكن يروح يشوف عروسة في المستشفي المكان مش عاطفي خااااااااااالص وهو ده السبب
لكن لو كنت شوفتها مثلا في طابو ولا لجنة اعتقد ان الجو ساعتها يكون مناسب وبعدين بص من الآخر علي راي سعد زغلول
مافيــــــــــــــــــــش فايــــــــــــــــده متحاولش وهو ده قمة التفاؤل

إسماعيل : يعنى يابنى الحاج قلك اللى إتجوزوا عملوا إيه ولسه مصر تمشى فى السكة دى أنا متأكد إنه قالها عشان يخلص ذمته من ربنا
وعلى رأى الشاعر(كل لبيب بالإشارة يفهم ......والحر تكفيه الإشارة .........والعبد يقرع بالعصا) وعجبــــــــــــــــــــــــــــــــــــــــــــــــــــــــــــــى

أسماء: اللي اتجوزا اكيد عملوا حاجه واللي يقول غير كده يبقي بينكر عشان الأزمات بتفجر المواهب :D D
ده لو كان فيه موهبة ، ولو مافيش اكيد بياخد كفاية الحكمة والموعظة اللي بيطلع بيها ويساعد بيها اللي حواليه انهم مايخدوش الخطوة دي

سامح : حأرد عليك فى النقاط التالية
اللى اتجوزا أكيد عملوا حاجة؟ أكيد طبعا كفاية أنهم خلفونا
الأزمات بتفجر الموهبة ده لو كان فى موهبة؟ والله ادينا بنحاول
وبالنسبة للموعظة أظن مفيش أحسن من كده

إسماعيل : أكيد للجواز فوايد كتيرة واللى يقول غير كده يبقى جاحد بس كنا بهزر إيه مابتهزروش؟!

سامح: لا يا إسماعيل باشا هزر براحتك ومحدش يقدر يمنعنا من الهزار يعنى حكومة فى الشغل وحكومة فى البيت وحكومة فى فيس بووك مايحكمشى ولا مؤاخذة .... أهم حاجة أن الناس كلها عرفة أن الإنسان ثروة بشرية جبارة من الممكن اشتغلالها أحسن استغلال إلا حكومة القرية الذكية ليه عشان هم بيفهموا أحسن من البشرية كلها عشان كده أنا رأى أن مكانهم مش هنا مكانهم فوق فوق خالص