طبعا كل راجل نفسه يتجوز عروسة زى هيفاء وهبى اليسا نانسى ولا حتى انجلينا جولى ولا كاميرون دياز
الرجاله : ايوه كده يا وديع آخيراً فهمتنى يا وديع
البنات : رجاله عينيها زايغه بمجرد ما يشوفوا واحدة حلوة يجروا وراها جاتكوا القرف
وكل بنت عايز تتجوز أحمد السقا ولا أحمد عز ولا الواد التركى ده اسمه ايه ده
ايوه مهند وناس تانية عايز شيبرد بتاع مسلسل
Gray's Anatomy
البنات : واو زى القمر هى دى الوسامة آخر حاجة
ورومانسية آخر تلات أربع حاجات
الرجاله : دى عيال سيس ومنظر على الفاضى
وقبل ما حد يقول ايه اللى أنت بتقوله ده نعدل الجملة إلى
معظم الرجال ومعظم البنات
عشان عارف فى ناس حتمشى بمبدأ خالف تعرف
وهو كل يقع تحت المثل القائل
عينى فيه وأقول أخييه
ياى بلدى
ماعلينا
نرجع لحوارى مع أبويا سورى اقصد دادى
--------------------------------------------------------------------------------------------------
أنا :ما هو حضرتك عارف انى سمعت كلامكم قبلك كده كام مرة وأنا بصراحة اتعقدت من الموضوع ده
دادى : اتعقدت؟!!! ليه ان شاء الله
ياابنى ياما فى ناس بتخطب وتفسخ و اللى يتجوز ويطلق
وأنت لسه ع البر مجرد زيارة ولا اتنين وبتبقى رايحهم وأنت عاصر على نفسك 2 كيلو ليمون
يا إما سعادتك متعجبكش العروسة يا إما العروسة تقول الخط مشغول الآن حاول الإتصال فى وقت أخر
عادى يعنى بس أنت اللى حنبلى ومش عارف عايز ايه بالضبط؟
أنا : والله
بقى أنا مش عارف عايزه ايه
يا حج والله أنا مش طماع
أنا عايز البنت اللى ارتبط بيها تبقى على خلق وعلى قدر من الجمال
ويكون فى قبول وأهلها يبقوا زينا يعنى نفس المستوى
وتكون مؤهل جامعى عشان أنت عارف لازم الزواج يكون فيه تكافؤ
شوفت مقلتش هيفاء ولا الست نانسى
يعنى ممكن تكون زى ياسمين عبد العزيز وربنا يسامحنا على الجريمة اللى حنعملها دى
الست الوالدة تتدخل فى الحوار بعد ما خلصت شغل المطبخ
مامى : ايه فى ايه خير ؟ بتتكلموا فى ايه
دادى : أبدا يا سيتى المحروس ابنك عايز يتجوز
مامى : ليه ايه اللى حصل فى الدنيا مش أنت ياواد قلت أنك مش حتتجوز واللى حتحوشه تشترى بيه عربية أحسن
أنا : ما أنت عارفه يا ست الكل
كل وقت وله آذان وأنا ببص لروحى فجأة لقيتنى كبرت فجأة تعبت من المفاجأة
مامى : لا أنت خسارة فيك ما احنا جبنالك كام عروسة تحب أفكرك
اركبوا معايا آلة الزمن وارجعوا 7 سنين يعنى سنة 2003
مامى : سامح يا سامح
أنا : نعم ياماما
مامى : والله ياواد يا سامح عندى ليك عروسة زى القمر
وايه بقى عندها عربية وشركة بيع تكييفات وحاجة ايه آخر جمال وادى صورتها
وعلى فكرة نصها مصرى ونص سورى وكانوا عايشين فى الكويت ولسه راجعين بقالهم سنتين
أنا : تبارك الخلاق فيما خلق ودى لقيتيها فين دى؟
أمى : وأنا ماشيه فى الشارع اتكعبلت فيها !أنت مالك المهم ايه رأيك؟
أنا : الجمال مهم طبعا بس مش كل حاجة لازم افكر وأعرف كل حاجة عنها
طبعا عرفت كل المعلومات المتاحة وطلبت فترة للتفكير
بعد 3 أيام من التفكير واستشارة المستشار الخاص بى
طبعا كلكم عارفينه
لا لا مش مرتضى منصور للأسف ده شئ كان يسعدنى
( الراجل معاه ملفات وسيديهات لمصر كلها ( ربنا يجعل كلامنا خفيف عليه
ده باسم أخويا طبعا
أمى : ها يا سامح فكرت؟
أنا : والله أنا فكرت ولا قيت الموضوع ده مش مناسب ليا
أمى : ليه بقى ان شاء الله؟
أنا : بص يا ست الكل
أولا : البنت مش محجبه
ثانيا: أكبر منى سناً مش بكتير
ثالثا: هى أغنى منى وأنا مرتبى ما وصلش 800 جنيه وبقالى سنة واحدة شغال
يعنى من الأخر هى اللى حتبقى اللى بتصرف على البيت وأنا راجل ومش ممكن أقبل بالوضع ده
طبعا سامع واحد فيكم بيقول راجل يا سامح شكلك كده بتشرب بيرل
لا يا سيدى مبحبهاش بحب اشرب فيروز
رابعا : أنا لسه بدرى أنا عندى 21 سنة ومحتاج فترة عشان أقدر اكون أسرة
أمى :والله أنت فقرى وخسارة فيك بقى الناس شاريينك وأنت رافض
أنا : ياماما شاريينى منين هو أنا عمرى شوفتهم قبل كده
أمى : ماهى الحاجة جارتنا اللى جايبلك العروسة
قالت لهم على كل حاجة عنك والناس موافقين عليك وعلى ظروفك كمان
وهما عايزين حد يكون طيب وابن ناس كويسين ويقدر يحافظ على بنتهم الوحيدة
أنا : اسبهليت من اللى بسمعه
وصحيت فجأة
بصى يا أمى كل شئ بالخناق إلا الجواز بالإتفاق
وأنا برفضى لا أنقص من البنت شئ ولا أنا حأزيد فى شئ
وكل حاجة قسمة ونصيب
وده رأى النهائى فى الموضوع ده
ودى كانت العروسة الأولى
إلى اللقاء مع الحلقة القادمة
*****************
تمت كتابة هذا الموضوع يوم 19/09/2010
*****************
تمت كتابة هذا الموضوع يوم 19/09/2010
