الاثنين، 18 أبريل 2011

هل العيد فرحة



كل سنة وأنتوا طيبين جميعا بمناسبة عيد الفطر المبارك أعاده الله علينا وعلى الأمة الإسلامية بكل خير
وماله يا خويا ما يضرش برده انت كنت لازم تشتغل مذيع فى النشرة
يا سيدى انت وهو وهى ده اسمه استهلال لابد منه
استهلال؟ هو فيه فعل جديد اسمه است اضاف فى اللغة واحنا منعرفش؟
يظهر انكوا مش عايشين معانا فى البلد
المهم
طبعا كلنا فاكرين صفاء أبو السعود وهى بتغنى أغنية أهلا بالعيد والعيد فرحة يا سلام
و الكبار فى البيت وهم بيسمعوا الست أم كلثوم وهى تصدح يا ليلة العيد
بس بس ايه يا بنى انت
انت وقعت فى كاسيت عربية أغانى العيد ولا ايه؟
يا سيدى ما انا جايلك فى الكلام اهو
كنا زمان بنحب أغانى العيد وهى مصدر السعادة لنا وننتظر العيد إلى العيد حتى نلبس الجديد ونفرح ونزيط وهات يا تنطيط
ايه ده؟ انت جبار ؟ انت ضليع فى اللغة العربية بقى ؟ قول يا عم المصدر
ايه يا سيدى متبوظش الصورة اللى بحاول ارسمها فى خيالك
ومالوا يا خويا ارسم يافنان حلوتك
هى حصلت انتوا حتقلبوا على تهامى ووديع
ما انت لازم تنجز شوية 
ناقص تقولولى ان اردت ان تنجز فعليك بالونجز
ما علينا كلنا آذان صاغية  
 منذ ان بدأت العمل عام 2002 ولم يعد للعيد هذا المذاق الذى كنت اشعر به
 وأصبح يمر مثل غيره من الأيام لا يختلف عنها سوى فى صلاة العيد
طيب يا سيدى واحنا مالنا
ما هو انت لازم تشاركونى فى الإجابة على السؤال ده
ايه هو السؤال ؟؟ لخص يا عم الأمور
انتوا مالك خلقكوا بقى ضيق ليه
السؤال : هل لازلت تشعر بطعم العيد كما كنت صغير؟
اذكر الأسباب فيما لا يزيد عن خمسة عشر سطرا سواء كانت الإجابة نعم أو لا ؟
طيب لو الإجابة أكتر من الخماشر سطر دول ايه نكتب على هدومنا ولا ايه
شكلك كده بتهزر يابنى احنا اخرنا نكتبلك مشكور خوى على المجهود
واصل تميزك 
لا تحرمنا من جديدك
وكده يعنى
ليه هو انا عامل منتدى  وعاوزين تزويدوا مشاركاتكم فيه !!
من الواضح الذوق مش نافع معاكم
لذلك فأنا أحذركم جميعا
انى قد الجأ لإعلان الأحكام العرفية فى سائر البلاد وأطبق قانون الطوارئ على سائر العباد
**********************
تمت كتابة هذا الموضوع يوم 8/09/2010