طبعا بعد النجاح الكبير لمسلسل عايزة أتجوز ومن قبله مدونة عايزة أتجوز التى كنت من متابعيها قبل أن تشتهر
حدثت حالة نفسنة شوية لا شويتين تجاه د/ غادة عادل وقولت لنفسى أيه رأيك يا واد يا سامح تجرب تكتب
فقلت اكتب أنا برده قصة حياتى يا عين وشغل حسن الأسمر بقى وأنت بتقرأ
ما هو اللى أنا كاتبه ده مأساة معظم الشباب ولكن معاناة شباب شرم الشيخ أكبر
اتفضلوا معايا
قاعد مع مجموعة من أصدقائى قلت بقى استشيرهم ولا خاب ايه؟
شاطرين
من استشار؟ شوفتم ديمقراطى اهو
أعوذ بالله
ايه يا جماعه وهو أنا قلت حاجة حرام ولا ايه
ماعلينا
حسام: ها احكى يا شهريار زمانك؟
هشام: طق طق شهرززادد
أنا : بتتكا قوى عليها كمان
ما تعرفوش اننا فى عصر المساواة شهريار بقى اللى بيحكى
نبدأ الحوار اللى دار بينى وبين أصدقائى
أنا : ها خلصنا كلية وجيش واشتغلنا يبقى فاضل ايه يا حلوين؟
حسام : فاضل انك تحج بقى
أنا : أحج فعلا هو المفروض الواحد يحج طبعا
بس فيه ايه حاجة لها أولوية قبل الحج
أحمد : فاضل ايه امم تشترى عربية؟
أنا :والله العربية لا غنى عنها
بس احنا عندنا عربية فى البيت
وبستخدم أحيانا عربية الشغل وخروجاتى قليلة يعنى حاليا مش محتاج عربية خاصة
يبقى فاضل ايه ايه يا حلوين؟
محمد :هههههههههههه
يكونشى
لالالا ياراجل لا متقولش
عايز تسافر؟
أنا : يادى النيلة أسافر فين ! بره مصر ! مش لما اسافر جو مصر الأول
محمود : يا خيبك ياواد أوع تكون عاوز تتجوز؟!
أنا : ياه والله !! ده ايه النباهه دى كلها وعرفتها لوحدك ولا حد غششك
هشام : جواز ايه بس ياعم سامح ليه بس يا بنى لسه بدرى عليك
مبلاش بكره تندم وتقولى انا اللى جبت ده كله لنفسى
وتغنى كنت فين يا لأه لما جيت أقول آه آه
أنا :يا سلام طيب ما ناس كتير متجوزين اي نعم معظمه طالع عينه (99%) يعنى
وأنتم فيكم ناس متجوزة أو على شفا جواز يعنى
كلهم فى نفس واحد : يووه يعنى مصمم .... أكيد
أنا :يا اخونا هو أنا بقول حانتحر ! أنا بقول عايز اتجوزززز
أصحابى : احنا نصحناك وعملنا اللى علينا مترجعش تقول محدش نصحنى آه؟
أنا : والله شكرا على النصيحة يا سيدى
ما الجواز سنة الحياة ونص الدين ولا ايه؟
أحمد :خلاص يا عم براحتك بقى
بكره تندم يا جميل
حسام : طيب تقدر تقولنا بقى عندك شقة؟
أيوه عندى شقة فى بلدتنا بالمنوفيه
كريم : والله وتفتكر يا ابنى حد ممكن يوافق أنت عايش فى شرم وعايز تتجوز فى المنوفية؟؟؟
أكيد حيقولولك عايزين شقة فى شرم وشقة فى المنوفية ولا فى المدينة اللى منها العروسة!
أنا :ايه يا اخونا ما هى الأساس برده والعفش وكل حاجة تبقى فى البلد وفى شرم نقضيها إيجار
حسام : إيجار مين والناس نايمين
أولا أهل العروسة مش حيوافقو
ثانيا أنت ناسى الإيجارات فى شرم كام دلوقتى؟
أنا : دلوقتى بقت عروسة!!!
يا سيدى ممكن أهلها يكونوا ناس طيبين
ويقدروا الظروف هو يعنى أنا لو أقدر اشترى شقة فى شرم الشيخ كنت أتاخرت
ما انتوا عارفين المتر وصل كام دلوقتى 6000- 7000 جنيه يعنى لو شقة 65 متر حيبقى ثمنها 390 ألف
وأنا مش من نواب القروض ولا شغال حرامى يعنى
اهو الإيجار الشغل ممكن يساعد بجزء وأنا بجزء والأمور تمشى أى نعم حأدفع شهريا من 2500-3500جنيه ايجار فى شقة أوضه وصالة
بس ما باليد حيلة
محمد : ياعم سيبوه يحلم
طيب حيقوللك عايزين شبكة من 15000-25000
هاه معاك ولا حتقسطهم ؟؟
أنا : لا الحمد لله مستورة
مرسى :طيب العفش بقى حتفرش كام أوضة؟
أنا : ياعم نجيب اوضتين والصالون وهم يبقى عليهم المطبخ والأجهزة الكهربائية
كريم : لا داهية لا تكون عايز دى فى دى كمان؟؟
أنا : يا اخونا هو فى حاجة تانى ولا ايه؟
كريم : ده غلبان يااخونا ميعرفش ان اللى حوشه طول 8 سنين حيدفعهم ويستلف عليهم كمان
ايه يا اسطى ناسى السجاد والنجف والستاير والفرح بقى قاعة وأكل وشرب ومواصلات وغيره وغيره
بسسسسسسسسسسسسسسسسسسس
كفاية سديتو نفسى
يعنى الواحد يعمل ايه
هشام : عملك اسود يا بعيد ما احنا عمالين نقول ايه من الصبح
هو أنت مفكر الجواز كده بالساهل
يا بنى ده أنت عند مشكلة أكبر من كل اللى فات
هو لسه فى مشاكل تانى
إسماعيل : المؤخر بقى والقايمة؟
كمال : لالا دى بسيطة بص يا ابنى لو هم عايزين مليون يحطوا و اكتب انت الأخر انك دافع مهر مليون جنيه
ساعتها تبقوا خالصين عايز تخلع ادفع الأرنب هى عايزه تخلعك تدفعلك الأرنب
أنا : ايه اللى أنتم بتقولوه ده
هو أنا باتجوز عشان اطلق ولا عشان استقر وأكون أسرة
والله لو الحياة وصلت لمرحلة الطلاق لا قدر الله كله واحد يروح لحال سبيله بالمعروف
الجواز ده مودة ورحمة مش شوية عفش وشوية ورق
يعنى يأمان على بنته معايا وعايز ضمان زى التلاجة
لالالا ده كلام لالالا أكيد بتبالغوا
أصحابى : بنبالغ طيب بكره تشوف
------------------------------------------------------------------------------------------------------------------------------------
روحت البيت
قلت افاتح السيد الوالد
بابا بابا
أبويا : نعم يا سامح
أنت مش ملاحظ أنى كبرت
أبويا : كبرت وبقيت زى الحيطه كمان خير ان شاء الله ايه المناسبة
يعنى ياحجيج كنت بفكر أتأهل
أبويا : مش فاهم عايز ايه بالضبط
ايه ياعم الحج انت مش معايا ولا ايه؟
أبويا: لا ياسيدى ما أنا ياما اتحايلت عليك أنا ووالدتك فى الموضوع ده بس سيدتك كنت بترفض
الباقى بقى بعدين عشان يابخت من زار وخفف
********************
تمت كتابة هذا الموضوع يوم 18/09/2010
تعليقات الأصدقاء على الحلقة
أحمد : سامح، نصيحة من اخ صغير
لو بنت الحلال موجودة توكل على اللة من غير متحسبلها وصدقنى ربك اللى هيسهلها مادام النية خير والحمد للة ،،،،، لان صدقنى لو حسبت لها مش هتتحرك وهتفضل قاعد تحسب لها وخد بالك كل ما تاخرت كل ما الحسبة بتكبر لان البلد كدة بالصلاة ع النبى رايحة فى داهية رايحة فيها وربنا معانا ياصاحبى !!
أحمد : سامح، نصيحة من اخ صغير
لو بنت الحلال موجودة توكل على اللة من غير متحسبلها وصدقنى ربك اللى هيسهلها مادام النية خير والحمد للة ،،،،، لان صدقنى لو حسبت لها مش هتتحرك وهتفضل قاعد تحسب لها وخد بالك كل ما تاخرت كل ما الحسبة بتكبر لان البلد كدة بالصلاة ع النبى رايحة فى داهية رايحة فيها وربنا معانا ياصاحبى !!
إسماعيل: الخطوة الجاية إنك
ياباشا تعملها مسلسل وتذيعها وتطالب بحقك إحنا بقينا أقلية ياعم الحاج ولا إيه؟
عمرو : كلامك مناسب جداً
وعندك حق خاصة شباب شرم الشيخ وسيناء عامة وكنت أنا وجماعة صحابى قاعدين بنتكلم فى
الموضوع ده وكانت نفسنا مفتوحة للجواز بشكل متتخيلوش وبنتناقش كإننا لاقينا
العروسة وقعدنا نحسب المصاريف من أول
الدبل لحد ما الباب يتقفل على العريس والعروسة ولاقيين المبلغ المطلوب مش مع أى
شاب والرقم ده كان من غير وضع الشقة فى الحسبان ومش عايز أقولك قومنا من القاعدة
دى ونفسنا اتسدت عن الجواز وقعدنا نسب ونلعن فى الجواز بجد ربنا يسترها علينا
باسم : ما أنا قلت لك سنة مش
فرض يا جنزورى
سامح: شاكر لكم تعليقاتكم
وتابعوا معايا لمزيد من التفاصيل وفعلا يا عمرو فعلا احنا عندنا مشاكل كتيرة كشباب
عايش فى شرم محدش واخد باله منها أن أى حاجة لازم تيجيب منها اتنين واحدة فى شرم
وواحدة فى المدينة الأصلية للأهل أنا باتكلم على الأشياء المادية عشان محدش دماغه
تسافر لبعيد
