الاثنين، 18 أبريل، 2011

عايز أتجوز 5- النسكافيه والشقة


ايه يا عم يعنى أنت تغيب كام يوم وبعد كده منزل حلقات ورا بعضها


يا سيدى ما أنا قولت أنى سافرت وإن شاء الله مش حتأخر تانى
بالله عليك ياأخى ما تتأخر اصل الحلقات بقت عامله زى النسكافيه نشربه ونام
أنت تأمر يا سيدى
طبعا ممكن حد يستغرب موضوع النسكافيه اللى بينيم ده
تقدروا تسألوا عمرو فتحى عليه عشان قبل ما يكتب عن الموضوع ده
كنت خلاص بدأت أحس انى جاى من كوكب تانى
أصلى أنا من اللى بيشربوا نسكافيه وشاى ويناموا
وينضم إلينا باسم أخويا وهو لازم يشرب كوباية شاى أول ما يصحى من النوم
عشان يفوق وبعد كده كوباية شاى تانية عشان محتاج يشرب شاى
 وكوباية شاى لزوم النوم
وبكده وصل عدد الحالات إلى 3 وجارى رصد الحالات الجديدة
وأنا من هذا المنبر بطالب السادة الدكاترة اصدقائى بعمل بحث عن هذه الحالة

ما علينا
هو احنا كنا بنقول ايه؟ ايه؟
ايوه
ايوه
الزيارة الثانية
-------------------------------------------------------------------------------------------------
ذهبت ومعى باسم أخويا إلى والد عماد
طبعا أنا طول الطريق يا ترى عايز ايه؟
 ورحب بنا وجلسنا مرة أخرى ودار الحوار التالى
والد عماد : أهلا وسهلا  شرفتونا بص بقى يا سامح
أنا بصراحة معنديش أى أسئلة
ولا عايز أعرف أى حاجة عنك لأنى اللى عرفته من عماد يكفينى
أنا : بينى وبين نفسى والله كويس الراجل طلع مش عاوز حاجة أمال طلب أنى أزورهم مرة أخرى ليه
والد عماد : بصراحة العروسة هدى هى اللى عايز تستفسر عن حاجات

حضرت هدى ووالدتها وقام والد عماد بأخذ باسم فى جولة تفقدية لقريتهم
وجلست أنا مع هدى ووالدتها ساعة ونصف وكنت عامل زى التى شيرت اللى بيتعصر لدرجة من كتر العصر نشف
ايوه ياعم أنا تى شرت أحسن من تشبيه السجادة وهو حاجة استايل برضه

والدة عماد: بص يا ابنى هو كل الحكاية أنها شايفة أنها لازم تشوفك مرة تانية وعندها أسئلة عاوزك تجاوب عليها
أنا : مفيش أى مشكلة وأنا مستعد للإجابة عن أى سؤال
حضرتك أنا شغال محاسب فى شركة استيراد وبيع كتب تعليم الغوص وهى تعتبر الوكيل الوحيد لمنظمة
PADI Internationla UK
ولى رصيد أجازات 96 يوم فى السنة ومواعيد شغلى من 8:30 صباحا حتى الساعة 6:30 مساءاً
عندى أجازة أسبوعية كل يوم جمعة يتم خصمها من 96 يوم
معندناش فى الشغل حاجة اسمها عيد أو أجازة رسمية كل الأيام زى بعض
الشركة بتقفل يومين فى السنة يوم 31/12 ويوم 1/1 

قبل كده كنت شغل محاسب فى مركز غوص وما بحبش شغل الفنادق
عشان الخمور رغم وجود آراء كثيرة حول هذا الموضوع
أحد الآراء أن مادمت تعمل بعيد عنها فمرتبك مقابل العمل الذى تقوم به
 والرأى الأخر إنك مهما كان عملك فهو يساهم فى إقبال الزبائن على الفندق
وبالتالى تكون مشارك فى الإثم والله أعلم
 وبرده البنوك بيقولوا فيها شبه ربا
 وبصراحة الواحد أصبح لا يعلم الحلال  أين ولكننى أحاول الإجتهاد
مرتبى الحمد لله يقدر يفتح بيت
الشقة عندى شقة فى المنوفية أما فى شرم الشيخ حيكون إيجار مفروش

والدة عماد : مفروش ازاى؟
أنا : بصى حضرتك معظم الشقق فى شرم الشيخ عبارة عن
استديو أو أوضة وصالة أو أوضتين وصالة وهى بتبقى فى فيلا
إمكانياتى الحالية أو كمان كام سنة أنى أأجر شقة أوضة وصالة
هدى: يا ترى تحب أنى أشتغل؟
أنا : والله مفيش مشكلة بالنسبة لى
 لو أنت عايزة تشتغلى خاصة أنك حتجلسى لوحدك
حتى السادسة والنصف مساء وده ممكن يزهقك بس
فى نفس الوقت ده حيعتمد حنقدر نلاقى شغل مناسب ليك ولا لا
والدة عماد : هى المسافة لشرم الشيخ سفر كام ساعة؟
أنا : هى حضرتك بالأتوبيس من شبين الكوم أو طنطا
أو بنها أو ميت غمر فى حدود 8أو 9 ساعات
والدة عماد : يااه مسافة بعيدة أوى

بعد الساعة ونصف عاد والد عماد وباسم وكان باسم كمن قام بإغراقه بالماء
والد عماد: يا ترى خلصتى أسئلة يا هدى؟
والدة عماد : هى سألت غير سؤال واحد وأنا اللى قعدت أسأله
والد عماد : أمال ايه الحكاية هو موجود معانا اهو لو عايزة تسألى عن أى حاجة
أنا : مفيش أى مشكلة أنا جاوبت على كل الأسئلة ولو فى أى سؤال أتفضلوا
والد عماد : أنا معنديش ها يا هدى فى أى حاجة تانى
هدى : لا يابابا مفيش أى حاجة

انصرفت أنا وباسم بعد ساعة بعد أن أصر على انتظار عماد القادم من عمله بالقاهرة
وفى طريق العودة دار الحوار التالى
أنا : ايه يا عم باسم أنت وقعت فى الترعة ولا ايه؟
باسم : أبدا ياخويا والد عماد أصر أنه يفرجنى على معالم القرية والجو كان رطوبة عالية قوى
بس أنت بقى كنت قاعد فى البيت أيه كمية العرق اللى أنت كنت فيها دى؟
أنا : يا ابنى أنا اتعصرت عصر من أول مامشيت أنت ووالد عماد وأنا بتكلم ساعة ونصف
وشرقت وهيصة

تانى يوم أتصلت بعماد 
أنا : ياترى يا عماد ايه الأخبار ؟
عماد : والله الجماعة لسه بيفكروا بس 
أنا : أنا أجازتى قربت تخلص ومحتاج أعرف الرد قبل ما أسافر
عشان لو موافقين أجيب الج والحاجة ونتفق على التفاصيل
عماد : أنت فاضلك كام يوم؟
أنا : فاضل 4 أيام
عماد : بعد بكره حأبلغك بالرد

بعد يومين
أنا : ألو  أزيك يا عماد ؟ ايه الأخبار؟
عماد : بص يا سيدى فى موافقة مبدئية بس فى بعض التفاصيل اللى محتاجين نعرف رأيك فيها
الشبكة 20000 جنيه المؤخر 20000 شقة شرم لازم تكون أوضتين وصالة عشان لو والدتها حبت تزورها
العفش عليك أوضتين وصالون والنجف والستاير واحنا علينا المطبخ والأجهزة الكهربائية والسجاد
طبعا الفرح عليك والخطوبة علينا
أنا : طيب بص أنا حافكر واتصل بيك
بابا : ها قالك ايه؟
بعد ما حكيت فى وجود كل البيت عشان احكى مرة واحدة
ماما : ليه يعنى عشرين ألف لا كتير
أنا : يا ستى مش مشكلة محدش له دعوة
ماما : خلاص أنا بقى مش موافقة ومش حأروح عاوز تروح روح أنت
أنا : يا ستى أنا اللى حأدفع ايه المشكله
ماما : يعنى أنا مش فارقة معاك؟
أنا : يا سيتى ياريتها تيجى على موضوع الشبكة
بس المشكلة مش فى دى
المشكلة فى موضوع الشقة
أهلها مش موافقين على شقة المنوفية وعايزين شقة فى شرم الشخ
وافرش الشقة بنفس العفش اللى كنت حاجيبه هنا
بس هنا فى المنوفية الشقة كبيرة ثلاثة أوض وصالون ومطبخ وحمام
فى الشرم الشقق صغيرة زائد أنا مقدرش اشترى شقة
ولو إيجار من المستحيلات إيجاد شقة على البلاط عشان كله بيأجر مفروش
عشان ما يخفضش سعر الإيجار ثم إن حتى لاقيت شقة
العقد بيكون سنوى ويبقى قدامى حلين
ياإما أقبل بأى زيادة فى الإيجار عشان منقلش العفش
ياإما حيطلع عينى على ماألاقى شقة فاضية تانية
وبهدلة فى النقل ده اللى بينقل ملابس فقط بيطلع عينه
 وبرده الإيجار غالى عشان أوضتين
بابا: يعنى أنت ايه رأيك؟
أنا : والله أنا حاسس أنهم حطوا العقدة فى المنشار
عشان أنا حسيت أن والدتها مش عاوزها تسافر بعيد عنها
وفى نفس الوقت ابقى أنا اللى رافض
وعلاقتى بعماد متتأثرش بأى شكل
باسم : يعنى أنت أخذت قرار؟
أنا : تقدر تقول كده 
عامة أنا مسافر بكره وأنا هناك حابقى أبلغهم قرارى
ودى كانت العروسة التانية

ولكن ظلت علاقتى بعماد مستمرة وبنفس الود والمحبة والقوة
وهذا ما نفتقده فى معظم مواضيع الزواج حيث أنها تصبح كالحرب لابد من فائز وخاسر
مع ان الموضوع ده لازم يكون فى احترام متبادل سواء تم أم لم يتم
فالإحترام والكلمة الطيبة هى الأبقى 
والموضوع أبسط من كده بكتير ومحدش عارف الخير فين
عشان كده دايما بأدعى قبل أى موضوع بدعاء الإستخارة
اللهم إن كنت تعلم أن فى هذا الموضوع خير لى فى دينى ودنياى ومعاشى وعاقبة أمرى فيسره لى
وإن كان فى هذا الموضوع شر لى فى دينى ودنياى ومعاشى وعاقبة أمرى فأصرفنى عنه واصرفه عنى
و الموضوع ما بيفرقش معايا كتير والتأثير لا يستمر أكثر من 48 ساعة
وأقوم ببرمجة نفسى مرة أخرى وعمل اسكان ورفرش وإصلاح للسوفت وير
والزواج مثل الرزق يرزقه الله لمن يشاء

إلى اللقاء فى الحلقة القادمة إن شاء الله
*************
تمت كتابة هذا الموضوع يوم 26/09/2010



تعليقات الأصدقاء على الحلقة
مى : خيرها فى غيرها
إسماعيل:
والله ياسموحة صعبت عليا يقطع الجواز على سنينه هوا الواحد لازم يتخرب بيته عشان يعجب؟؟؟؟؟؟
ربنا يرزقك ببنت الحلال الى تقدرك وتعزرك وترضيك (أميــــــــــــــــــــــــــن)
أما موضوع الشاى فأنا كمان مابيفرقش معايا لو عايز أصحى بأصحى ولو عايز أنام بنام الموضوع مش أكتر من(
psychic support).

مى : أنا نسيت اعلق على موضوع الشاى والنسكافيه وباتفق مع إسماعيل تماما

أسماء: تعيش وتاخد غيرها  :Dمستنيه الحكاوي الكتير التانيه ما انا كنت طرف في المواشيع دي بيتهالي انا اللي اصعب عليكم مش هو من كتر اللي انا شفته

مى: الله يكون فى عونك يا أسماء يلا نصيبك كده

أسماء: أيوه يا مى أخت العريس  بتبقى عاملة زى أم العروسة بالظبط

هشام: علشان انت !!!!!!! رحت تانى واخد الدكتور اللى عمل جوله سياحيه فى القريه السياحيه هى بالمناسبه هى اسمها ايه ممكن تكون الفور سيزون يلا يا عم باسم بكره اخوك يوديك الجولف وبعدين بعد اسئله لمدة ساعه ونصف على حد قول سيادتك اللى انت ما قولتش منهم الا 2 او 3 اسئله ودول ما ياخدوش اكتر من 10 دقايق ولا انت مكسوف تقول !!!!!!! ثم كمان يقولوا 20000 شبكه ومؤخر زيهم وتقول اوكيه رغم ان والدتك مش موافقه وتمسك فى الشقه اام حجرتين وتقول ماقدرش
بص يا بنى انت من غير ما تعمل اجتماع للعيله كلها علشان متقولشى الكلام الا مره واحده انت كنت ترد على حماك المبجل وتقوله والله يا عمى انا كنت بفكر فى اكتر من كده بعد ما شوفت كريمتكم ان عاوز اجيب خاتم سوليتير وفيلا على البحر 5 حجرات علشان لما حد ييجى يقدر يبرطع بس المشكله انى خسرت فلوسى فى البورصه ولا انت يا عمو متعرفش انى فيه ازمه اقتصاديه ولى الى اللقاء فى حلقه قادمه ان شاء الله علشان انا تعبت بس ممكن اكمل بكره يا عم قوم اتجوز

طارق: مبدئيًا قبل ما اقرأ أو أعلق على الموضوع نفسه. انا زي ماعملت مع عمرو صاحبى مش هسمح لحد يشتم الكيف بتاعي احم احم قصدي النسكافيه بتاعي بصراحة انا عارف ان النسكافيه مبيعملش حاجة معايا غير السايكيك سببورت دي بس انا لحب السببورت ده وبشربه الصبح عشان افوق وبشربه بالليل قبل مانام عشان انام ودماغي رايقة

سامح : هى فين الشتيمة احنا شعب مزاجنجى عن حق وأنا طبعا كييف نسكافيه حتى ايام امتحانات الكلية اصلى الفجر واربط راسى عشان المعلومات ما تسحشى على بعضيها واعمل 3 مجات نسكافيه معتبرين سيك ساده يعنى من غير لبن ومن غير فطار عشان نسلطن الطاسه قبل منروح نمتحن اه أومال ايه