الاثنين، 18 أبريل 2011

عايز أتجوز 13 الحلقة الأخيرة - الإنترنت


ايه ولا دايم غير وجه الله وحدوه
لا إله الإ الله
كلنا لها
الله يرحمه كان راجل طيب
بس ياأم أحمد متعمليش فى نفسك كده
فيه ايه يا أختشى
حد مات
لا
طيب لما هو لا
بتعيطى ليه
أصل أصل
مسلسل عايز اتجوز دى حلقته الأخيرة
ومش عارفه يا أختى حاعمل ايه بعديه
صحيح عالم فاضية
يا ست أقومى اعملى طاجن بامية باللحمة الضانى
للموكوس جوزك أقبل ما يجى من الشغل

ماعلينا
--------------------------------------------------------- 

بعد ما رجعت من العمرة كانت هناك أحد
معارف الأسرة التى انقطعت اتصالاتنا بهم لفترة من الزمن
ولكن بالصدفة فى أحد مواقع الإنترنت تعرفت على
حنان الابنة الصغرى لهذه الأسرة
بعد أن تبادلنا الحوار والنقاش فى بعض المواضيع
وجدت شئ ما يجذبنى إليها
ولكنى لاأعرف هل الشعور متبادل ام لا
فبعد فترة وجيزة وخلال شهر يونيو الماضى
 قررت أنا افاتح والدى فى هذا الموضوع
وفاتحته ولكنه ابدى اعتراضه على اختيارى

بابا : يا سامح أهلها طلباتهم حتبقى عالية وأنت مش حتقدر عليها
أنا : ياحاج اهو نحاول حنخسر ايه
ثم ما جايز هى متوافقش من الأساس؟
حد عارف؟
بابا : والله أنت حر بس أنا قولتلك رأى
باسم : مش ملاحظ أنك ممكن تكون مستعجل؟
أنا : بص يادوك والله أنا شايف فى شئ بيجذبنى تجاهها
وأنا مابقتش بحب نظام المشاعر من طرف واحد
لأنه بيستنزف مشاعرك على الفاضى
والموضوع لسه فى أوله قبل ما أى مشاعر تكبر جوايا
فمن الأخر لازم احسم الموقف وأنا مبحبش اتعلق
ومعرفش راسى من رجلى
باسم : بس دى مش ياسمين عبد العزيز زى ما أنت بتقول على طول؟
أنا : هى مش ياسمين بس أن حاسس بشئ يجذبنى إليها
وهو ده الفرق إنما مادام حاتجوز واحدة
معرفهاش لازم ألاقى فيها مواصفات تجذبنى ليها
أنما لو كان فى سابق معرفة بيها وبأسرتها
فى حاجات ممكن تتغير
وبعد كده بيومين
ارسلت لها رسالة على البريد الخاص بها
وكان نصها كالتالى:

هو سؤال شخصى وقد يترتب عليه أسئلة أخرى
 واريد إجابة ولكن إذا لم ترغبى فى الرد حتفهم وجهة نظرك
 ولكن أتمنى أن لا يؤثر على صداقتنا
 مهما كانت الإجابة على هذا السؤال أو أى أسئلة أخرى
 ايه يا سيدى السؤال؟
 ما أنا حقول اهوت بس متردد شوية
 يا ابنى حتسأل ولا أقفل الرسالة؟
هو أنت غاوى تتعب أعصابى؟
لا والله
بس لم اعتاد أن أتدخل فى شئون أحد من قبل
الله يصبرك ياروح
بصى يا ستى
هو يعنى يعنى يعنى
هل أنت مخطوبة أو مرتبطة بأى شكل من الأشكال؟
طيب وأنت مالك
والله ان كنتى مخطوبة أو مرتبطة ربنا يوفقك ان شاء الله
اما إذا كانت الإجابة لا
هل توافقنى على وعلى ظروفى؟
ايه اللى أنت بتقول ده
بصراحة أنا محرج جدا بس هى عادتى ولا حشتريها!!
 إذا لم يصلنى رد خلال أسبوع سأعلم أننا أصدقاء وبس
فى النهاية مهما كانت الإجابة
 أرجو أن نظل أصدقاءمع تمنياتى بحياة سعيدة وغد مشرق بإذن الله
  
طبعا أنا كنت عامل الرسالة على شكل حوار وبرد فيه على نفسى من باب تلطيف الأجواء
وبعد كده بيومين جائنى الرد التالى :

بصراحة أنت فاجأتنى
  يا سيدي أنا مش مرتبطة و لا حاجة
بس عشان أكون صريحة معاك
أنا لسه بأدرس فى كلية آثار
يعنى إذا حصل نصيب لازم اخلص دراستى الأول 
خلينا ندردش و نتكلم في حاجات كتير
 و اللي فيه الخير يعملوا ربنا.

وارسلت لها الرسالة التالية:

طبعا شكرا على الرد
ثانيا أكيد طبعا فى حاجات كتير لازم نعرفها عن بعض
هل تحبين الدردشة عن طريق الرسائل أم عن طريق التليفون؟
أكيد طبعا لازم نتقابل بس حاليا ظروف شغلى لا تسمح بأخذ إجازة
ولكن يوما ما سنتقابل ان شاء الله
وأنا مستعد لكل أسئلتك واستفسارتك
ومش حاخبى حاجة لأنى بأفضل الصراحة
وربنا يرزقك ويرزقنى الخير أينما كان

  فكان ردها كمايلى

خلينا نبدأ الكلام عن طريق الشات
كلمني عن ظروف شغلك,حياتك,هوايتك,
بتحب ايه و مبتحبش ايه...
كده يعني .

وبالفعل ارسلت لها رسالة بها إجابة عن أسئلتها
ولكن لم يصلنى رد منها بعد ذلك
وتفهمت وجهة نظرها فى أنها ترغب أن تظل العلاقة صداقة لاغير
وأغلقت هذه الصفحة تماما ونقطة
صفحة جديدة وقلم جديد ومن أول السطر

---------------------------------------------------------
 واهم من يعتقد أن بالزواج قد انهى كثير من مشاكله
لأن الزواج حياة أخرى فيها أطراف أخرى وعلاقات متشابكة وسلسلة
لا تنتهى من هواجس وأفكار ومشاكل ولكن من نوع آخر
سنة أولى زواج
دايما بتبقى أصعب سنة عشان
خلال فترة الخطوبة كل واحد بيحاول
 يبين أجمل مافيه فقط دون اظهار العيوب
وعلى رأى المثل تعرف فلان
ايوه
عشيرته
لا
يبقى معرفتوش
مصروف البيت
وياجارية اطبخى كلف يا سيدى
وانتوا عارفين بقى كيلو الطماطم وصل 11 جنيه
وكيلو الفاصوليا الخضراء 20 جنيه وكيلو اللحمة 80 جنيه و............إلخ
الإنجاب
ودى بقى خد عندك
هو ايه الحكاية انتوا متجوزين من 3 شهور 
 ومفيش حاجة فى السكة
وكل من هب ودب يتدخل فى خصوصياتك
بطريقة مستفزة وغريبة وعجيبة
زواج أحد الأقارب
فستان جديد وهدية قيمة آه أومال ايه
 أصلها كانت بتترسم عليا يا خويا
ولازم اعرفها ان اجوزت واحد هى ما تحلمش بيه
وهو بعملك برستيج وسط أهلى
مقابلة صديق قديم بالنسبة للزوج
ايه يا معلم أخبارك وايه الدنيا
معاك ايه دلوقتى
يقصد العربيات والفيلات والمشاريع طبعا
بالنسبة للزوجة عند مقابلة صديقة قديمة
ايه يا حبيبتى أخبارك ايه أوومواه
معاك ايه
تقصد طبعا الأولاد
الأطفال
ربنا كرمك وانجبت الواد سخن البنت عندها برد
الحق اجرى على المستشفى أو دكتور فى عيادته
و عايزين هدوم العيد وملابس الأطفال غالية
وحاجة مجيش اد ذراعك ب250 جنيه على الأقل
وتبتدى تستخسر تشترى لنفسك حاجة جديدة
عشان توفر
وتدخل على العيال ببطيخة والجرنال تحت ذراعك وتفرح العيال
العيال دخلو المدرسة
كتب المدرسة اللى زى الزفت مش موجودة
والكتب الخارجية  بتتباع فى السوق السوداء
ولو مسكوك وأنت شايل أكثر من 3 كتب يعملولك قضية إتجار مش تعاطى
والعيال عايزين موبايلات
وشنط وأدوات مدرسية و.......... إلخ
العيال ثانوية عمياء
طبعا رعب وخوف ودروس خصوصية
وتصرف مصاريف ملهاش أول من آخر
 وفى الأخر الواد يدخل تجارة جامعة خاصة
العيال فى الكلية
محاضرات وملخصات ورحلات
والعيال عايزين عربيات عشان يبقوا زى أصحابهم
والواد يتنيل يحب وسعادتك مطلوب منك
 انك تعيينه فى وظيفة
وتشترى له شقة وتجوزه
إذا عرفت يعنى
ولو معرفتش
الواد يغنى لك
نازل وأنا ماشى
على الشوك برجلايا
 وأنت السبب يابا
يلى خليت بيا 
لا فرشت لى بستان
ولا حتى بر أمان
أعيش عليه إنسان
والدنيا فى ايديا
وأنت ترد عليه وتقوله
 وأنا وأنا أعمل ايه
وأنا وأنا بإيدى ايه

وفجأة

تكتشف انك كبرت وعجزت وعمرك اتسرق منك
وتسمع بقى عبد الباسط حمودة وهو بيغنى
أنا أنا أنا
أنا مش أنا
لادى ملامحى
ولا شكلى شكلى
ولا ده
ولا ده أنا
أنا مش عارفنى
أنا تهت منى
أنا مش أنا
أبص لروحى فجأة
لقيتنى كبرت فجأة
تعبت من المفاجأة
ونزلت دمعتى
 اقوليلى ايه يامرايتى
قوليلى ايه حكايتى
تكنش دى نهايتى
وأخر قصتى
ابص لروحى فجأة
لقيتنى كبرت فجأة
تعبت من المفاجأة
يادنيا طفيتى شمعى
ياناس كترتوا دمعى
والعمر راح هدر
كتبت الآه بقلمى
كسرتوا سن قلمى
وبرده بقول قدر
حزين من صغر سنى
ومين على الآه يعينى
وخدانى الخطاوى
لسكة تايهه منى
ابص لروحى فجأة
لقيتنى كبرت فجأة
تعبت من المفاجأة
ياليل الجرح قالى
معايا زى ضلى
ماآنس وحدتى
سرقت العمر كله
خلاص ما بقاش فاضلى
غير جرحى ودمعتى
جريح وده مش بيدى
مخدتش بس بدى
زرعت يا ناس وروودى
جنيت الشوك لوحدى
 أبص لروحى فجأة
لقيتنى كبرت فجأة
تعبت من المفاجأة
ونزلت دمعتى
 اقوليلى ايه يامرايتى
قوليلى ايه حكايتى
تكنش دى نهايتى
وأخر قصتى
 أنا مش أنا
لادى ملامحى
ولا شكلى شكلى
 ولا ده أنا
أنا مش عارفنى
أنا تهت منى
أنا مش أنا

 طبعا نهاية أسود من نهاية شيخ العرب همام

 طبعا دى تعتبر الحلقة الأخيرة حتى الآن
ومين عارف بكره فيه ايه
 وعلى رأى الشاعر
No woman No cry

معلش بقى زى ماقولت الحلقة الماضية
أنى محتاج اسمع لنفسى شوية
فإحتمال أغيب عنكم بعض الوقت
طبعا حتوحشونى كلكم وحتوحشنى تعليقاتكم
اللى كانت بتسعدنى حتى ولو كنا مختلفين

كلمة أخيرة
الحياة مش جواز وبحث عن الشخص المناسب فقط
الحياة هى أسرتك اللى بتحبك
حتى ولو لم يعجبنا هذا الحب
فأحيانا من الحب ماقتل
الحياة هى أصدقائك اللى تقضى معهم بعض الأوقات
 سواء إذا كنت تراهم أو تسمع صوتهم
الحياة هى عملك اللى بيخليك تحس إنك ممكن تعمل الفرق
حتى لو أنت مش حاسس بكده
الحياة هى الإستمتاع بما حابنا به الله من نعم كثيرة
ولكن الدنيا أوقات بتخدنا وننسى النعم اللى عندنا
الحياة هى أنت

 لا ده مش شعار الحزن الوطنى يا خفيف
ده شعارك أنت وهو وهى
حب نفسك قوى بس متجيش على حق حد تانى
حب لأخيك ما تحبه لنفسك
حول أى يأس واحباط إلى طاقة تدفعك للأمام
دعك من الماضى فالماضى عدى وفات
وفكر بتفاؤل لبكره
عشان لو اتشئمت مش حتتحرك خطوة واحدة
مهما كانت الدنيا وحشة تفائل خيرا
افتكر أنت كنت فييين زمان ودلوقتتى بقيت فين
لو لقيت أنك متغيرش فيك حاجة وده صعب
غير من نفسك وغير الأماكن والوجوه
سافر اتغرب وارمى كل اللى فات وراء ظهرك
 ومتنساش تبص حواليك حتلاقى بلاوى
واللى يشوف بلاوى الناس تهون عليه بلوته

و لازم تعرفوا حاجة عنى أنا
أحيانا أصاب ببعض الإحباطات
لفترة من الوقت وتأثر على نفسيا
ولكنى شخصية حالمة
ودائما حلمى أمامى حتى
ولو كان مستحيل تحقيقه
باضعه دائما أمامى حتى أكسر
اى حالة احباط

ومقتنع تماما أن كل شئ بيد الله
فهو إن أراد شئ يقول له كون فيكون
ولما بتخنق قوى من الدنيا واللى فيها
عندى مكان مفضل بيبقى هو المكان
الوحيد اللى بيقربنى من ربنا
ويخلينى أحس بمدى نعمه على
ألا وهو الغوص
فعندما أكون مهموما أذهب وأغطس فى البحر
وانسى كل شئ حولى واتذكر قدرة الخالق عز وجل على
فخطأ بسيط من الممكن أن يؤدى إلى مشاكل كبيرة
أبسطها انفجار فى الرئتين

فى البحر  تكون وسط المجهول معلق فى وسط المياه
لا تطول سماء ولا أرض شعور جميل ومخيف فى نفس الوقت
وأتذكر أيضا كيف أستطعت تحقيق ما كان فى نظرى
 ونظر كثيرين حولى مستحيل
فأنا لا أخفى عليكم سرا فأنا كنت أخاف البحر والسباحة
واستطعت التغلب على هذا الخوف
ولكن البحر برده له هيبة ويجب أن تخشاه

آسف جدا على الإزعاج
وأراكم إن كان فى العمر بقية إن شاء الله على خير
وسلسلة جديدة من الكتابات
بس المرة الجاية إن شاء الله
حيبقى الكلام جاد شويتين بس الطابع الساخر
 حيكون موجود عند اللزوم اصل ده طبع
والطبع يغلب ايه
برافو
التطبع
عشان حيكون سياسى
وعلى رأينا كأهلاوية
اللى خايف  يروح
ويرفع شعار ياحيط دارينى دارينى ياحيط
ويمشى جنب الحيط
لحد ما الحيط تقع فوق رأسه
*********************
تمت كتابة هذا الموضوع يوم 03/10/2010


 

تعليقات الأصدقاء على الحلقة:

جابر: دى أجمد حلقه الله عليك

أسماء: مش شرط تكون متجوز يعني عشان تغني الأغنية دي ولا ايه؟:D Dواكيد اكيد المعني في بطن الشاعر

طارق: استمتعت جدا بالحلقات وربنا يوفقك ويوفقنا إن شاء الله

باسم: دى مش نهـــاية... دى البـــداية انت يــاابنى مكانك مش هنا .... مكانك فوق ..فوق ..فوق

قلت لاحد زملائى الاعزاء
ايه ياابنى انت مش عاوز تتجوز ولا ايه !!؟
قال:/ عاوز طبعا
قلت:/ طيب مابتحاوليشليه تدور على عروسة!!؟
قال:/ بص يااخويا , الجواز عامل زى ما تكون ماشى فى الشارع لا بيك و لا عليك و تلاقى نفسك حد حدفك بطوبة فتحت دماغك
قلت:/ وماله يعم الحج بس الواحد ممكن يختار الطوبة اللى تفتح دماغه!!؟
قال:/ ونستعجل ليه ..ما نسيبها تيجي ببركتها

هشام: يابنى انا دلوقتى حسيت انك اتجوزت وخلفت وربيت وعلمت وجوزت وكبرت فى السن يا سلام يا عم على العموم اللى انا شايفه دلوقتى ان اختياراتك كلها غلط فكر فى كل اللى فات وصحح اخطائك ولا اقوللك بلاها كلية اداب ولا اثار ودور على خدعه اجتماعيه يمكن ربنا يكرمك وروح دلوفتى غير العنوان ده وخليه بدل عايز اتجوز الى عنوان رحلة البحث عن عروسه وعاوز اقوللك برده اوعى تنزل اى قصص عن رحلة بحث قادمه علشان انا زهقت خلالالالالالالالالالالالالالاص

سامح: الجزء الأول موجه ليك ياأبو العيال وللناس اللى بتفكر ان بالجواز مشاكله خلصت وناسيين ان فى حياة تانية خالص بتبدى بحلوها ومرها بالنسبة للإختيار جربت العقل منفعش جربت القلب منفعش احتمال اختيارى كان غلط أنا لست ملاكا ولست شيطانا ولكنى انسان
وادينا بنتعلم يا سيدى مادام العمر يجرى بالنسبة لتغيير العنوان والقصص القادمة ما أظنش لا حاغيره ولا حاكتب قصص قادمة
الإ لولقيتلها نهاية عشان افرحكوا معايا وادعى ان ربنا يمد فى عمرك وعمرى

لو حد سألنى دلوقتى أنت هدفك ايه من القصص دى؟ حأقوله فضفضة ممكن نصيحة للغير جايز طلب للنصيجة أكيد