الاثنين، 18 أبريل، 2011

عايز أتجوز 4 - الزيارة


طبعا أنا آسف على التأخير الذى حدث نتيجة السفر المفاجئ
ماعلينا
نكمل بقى الحكاية
-------------------------------------------------------------------------------------------------------------
باسم: ألو ازيك ياعماد؟ أخبارك ايه؟
عماد : الحمد لله
باسم : بص يا سيدى احنا كنا عايزين نخطب أختك هدى لسامح؟
عماد : والله أنا مش حنلاقى أحسن من سامح
بس هو متصلش ليه؟ أوعى يكون مكسوف؟
باسم : ما أنت عارف سامح بيحرج من الكلام فى المواضيع دى
عماد: ليه ياابنى هو إحنا غرب!! احنا نعرف بعض من كام سنة
باسم: أنت عارفه بقى
المهم نقدر نيجى نزوركوا امتى؟
عماد : بص أنا حكلمهم فى البيت الأول فكلمنى على بكره؟


تانى يوم فى الميعاد المتفق عليه

باسم : ألو ازيك ياعماد؟
عماد : ألو أهلا باسم أخبارك ايه 
باسم : الحمد لله ها ياترى كلمتهم فى البيت؟
عماد : أيو كلمتهم وياريت تشرفونا يوم الجمعة الجاية إن شاء الله
باسم : بقولك ايه يا عماد ما ينفعش نسيب سامح وأختك عشر دقايق لوحدهم يتكلموا مع بعض
عماد: باسم أنت بتهرج لا طبعا ما ينفعش
باسم : ياعماد أنا أقصد  أنهم يتكلموا لوحدهم يعنى
 الكل قاعد حيكون فى رهبة شوية
ويا سيدى واحنا مش حنكون بعيد يعنى
عماد : لالالا ما يصحش برده يا باسم

يوم الجمعة صباحا ذهبنا أنا وباسم وأسماء فى الميعاد المحدد واحنا فى الطريق اشترينا هدية
عماد : أهلا وسهلا ازيك يا سامح؟ ازيك يا باسم؟ ازيك يا أسماء؟ اتفضلوا اتفضلوا

ودخلنا البيت وحضر والد عماد  وبعد فترة والدته وأخته
والد عماد : سلمى يا هدى
جاءت هدى وسلمت علينا وبالصدفة كان ترتيب جلوسنا أنا فى الأول وبعد كده أسماء وبعدين باسم
وقعدنا جميعا لفترة نتحدث بشكل عام وحان صلاة الجمعه وذهبنا نصلى وتركنا أسماء مع هدى ووالدتها
ورجعنا مرة أخرى للبيت وكانت كلاماتى قليلة مع هدى ولكنى كنت أتحدث مع عماد ووالده
ايه يا اخواتى الرجالة اللى بتتكسف دى ده طبعا تعليق معظمكم
المهم اصروا على تناول الغداء معهم وجلسنا لتناول الغداء فأكلنا وكانت السفرة عامرة ما شاء الله
طبعا أنا خلصت أكل بسرعة وأسماء كذلك
 فوالد عماد: ياولاد ما ينفعش الكلام ده ده مش أكل
أنا: والله حضرتك أنا شبعت والواحد معدش متعود على الأكل الجامد ده
 الشغل بيخلى الواحد يأكل وجبة ولا وجبتين بالكتير فى اليوم
أسماء : والله يا عمى انا كلت وأنا مش متعودة على الأكل الدسم ده
باسم : ياعمى سيبك منهم دى ناس مدلعة قاعدة فى البيت
 وبيأكلو اللى هم عايزينه انما اللى زى أنا كده وقاعد فى المدينة مابيلاقيش أكل حلو كده غير فى الأجازات
والد عماد : بالهنا والشفا بس ما يصحش أنهم ما يكلوش
باسم : اللى يأكل على ضرسه ينفع نفسه ولا ايه
أنا : طبعا واحنا مش محتاجين عزومة

 شربنا الشاى وجلسنا حتى العصر
أنا : بعد إذنك يا عمى نستئذن
والد عماد : لا لا خليكوا قاعدين لحد ما الجو يبقى كويس
باسم : أصل احنا مش عايزين نمشى بالليل وسامح مش متعود على السواقة بالليل

أثناء العودة دار حوار بينى وبين باسم وأسماء
باسم وأسماء : ها ايه رايك يا سامح؟
أنا : بصراحة مش عارف
أسماء بطريقة هجومية : ايه اللى مش عارف! هو كل حاجة مش عارف
أنا : ياهانم انا لسه شايفها يعنى لازم أخذ وقت اجمع صورتها فى دماغى
 أما بالنسبة للعيلة أكيد طبعا موافق وإلا مكنتش اتقدمت أصلا
باسم : يعنى أنت محتاج وقت عشان تفكر
ايه المشكلة عادى يعنى
أنا : قول للهانم هو ايه سلق بيض ده حياة ولازم اكون مقتنع
باسم : مفيش مشكلة
أسماء : هو أنت متكلمتش معاها ليه واحنا قاعدين؟
أنا : طيب ما أنا كلمتها
باسم : ايوه كلمتها بس يعنى سؤالين وخلاص
أنا : يعنى يا عالم أنا لسه شايفها ووالدها ووالدتها وأخواتها الإثنين قاعدين اتكلم ازاى والنبى!!! لازم فترة
عشان استوعب الوضع وفى نفس الوقت ده مش غداء أصدقاء الناس عارفين احنا رايحين ليه
احنا رايحين لرؤية البنت وعشان هى تشوفنى يعنى بمعنى أدق عشان نشوف فى قبول ولا لا
أنتوا ايه مفيش تفكير ياساتر وأنا كده طبعى كده ايه الجديد يعنى
باسم : خلاص يا عمنا خد وقتك بس مش ملا حظ حاجة ايديها كانت بترتعش وهى بتسلم
ايه هو أنت كهربتها ولا ايه
أسماء : فعلا ايديها كانت بترتعش
أنا : أصلها اتخضت وهى بتسلم لقيت نفسها بتسلم عليا الأول
باسم : فعلا كان واضح قوى الموضوع ده
بعد الزيارة بيومين
باسم : ألو ازيك يا عماد؟
عماد : أهلا يا باسم
باسم : يا ترى ايه الأخبار عندك
عماد : والله انا سافرت فى نفس اليوم عشان كانت إجازتى خلصت
بس هو سامح ما بيكلمنيش ليه؟ مش غريبة شوية
باسم : ما أنت قولتلك هو محرج شوية
عماد : لا يا عم لا إحراج ولا حاجة أنا حكلمهم فى البيت كمان ساعتين اتصل بيا
 باسم : سامح أنت لازم اللى تكلمه عشان كده ما ينفعش
أنا : يا سيدى ما أنت المتحدث الرسمى
باسم : ماشى يا سيدى بس برده المفروض أنك اللى عايز تتجوز
أنا : خلاص ياعم أنا حاكلمه بعد ساعتين

بعد ساعتين
أنا : ألو ازيك يا عماد؟
عماد : أهلا سامح
طبعا زمانو كان بيقول ايه ده أبو الهول نطق مش ممكن
أنا : أهلا يا عماد ها ايه الأخبار؟ يا ترى فى قبول من الوالد والوالدة وأختك ولا ايه؟
عماد : والله يا سامح فى بعض الحاجات اللى الوالد محتاج
يستفسر عليها وعشان كده محتاجين انك تيجى زيارة تانى
أنا : حاجات زى ايه ؟
عماد : والله ما عرفش أنت عارف أنا سافرت فى نفس اليوم فياريت تروح بكرة بعد العصر عشان هو مستنيك
أنا : ماشى يا عماد مفيش مشكلة
سلام سلام
كل اللى فالبيت : ها ايه الأخبار؟
أنا : عايزين انى أروح بكره عشان فى حاجات والد عماد عايز يسألنى عليها
بابا : مفيش مشكلة بس أوع تتفق على حاجة مش فى استطاعتك
أنا : ياحج رحم الله امرؤ عرف قدر نفسه أنا حاتكلم عن اللى أقدر اعمله
حاليا فقط وانت عارف أنا واقعى
ان شاء الله أروح زيارة بكره لوحدى
بابا : لا . خد باسم معاك
أنا : ليه ياحج؟
بابا : ياسيدى على الأقل عشان الطريق
باسم : أنا معنديش مانع
أنا : خلاص بكره ان شاء الله بعد العصر نطلع على طول

إلى اللقاء فى الحلقة القادمة ان شاء الله
********
تمت كتابة هذا الموضوع يوم 26/09/2011



تعليقات الأصدقاء على الحلقة

جابر : مبروك وربنا يتمم بخير

سامح: هو ايه؟ فين؟ مين؟ ما تصحى معايا ياجابر
مى : فى انتظار الزيارة القادمة