الاثنين، 18 أبريل، 2011

الطبقة المتوسطة


ينقسم أى مجتمع إلى ثلاث طبقات
الطبقة الغنية والطبقة المتوسطة والطبقة العاملة
طيب يا سيدى ما احنا عارفين الكلام ده
طيب يا شاطرين حد فيكوا يقدر يفرق بين طبقات المجتمع دول
ايوه أنا أعرف طبعا احنا بنقرا برده
الطبقة الغنية هى أرقى طبقة فى المجتمع وتمتاز بالغنى والسلطة
الطبقة المتوسطة هى طبقة تمتلك قدر محدود من الموارد المادية وتعتير هى رمانة ميزان المجتمع
الطبقة العاملة هى أفقر طبقات المجتمع وتمثل العمال والكادحين من المجتمع

بص يا سيد يا محترم كل اللى قولته سعادتك كلام مظبوط من الناحية الأكاديمية
ممكن بقى تقدر تحدد الطبقات دى فى عصرنا الحالى

مش فاهم تقصد ايه
اقصد الطبقة الغنية الحالية هل هى طبقة غنية بالفعل منذ القدم ؟
ام هى طبقة ظهرت فجأة فى المجتمع نتيجة لظروف سياسية
واقتصادية معينة أو نتيجة أسباب مجهولة المصدر
وتشعر فى أغلبها بكراهية شديدة لكل ما يذكرها بماضيها
مع الإعتراف بأن هنالك فئة فى هذه الطبقة نقدر نقول عليها
نقية لاتعانى من مشاكل النقص والعقد نفسية نتيجة أنها
 ذات أصول سابقة ورغم مرورهم بظروف التأميم استطاعوا إعادة شأنهم مرة أخرى

الطبقة المتوسطة هى فعلا رمانة الميزان وكلما زادت هذه الطبقة
 دل ذلك على سلامة حالة المجتمع فتعتبر هذه الطبقة عصب المجتمع
 فهى التى قامت بالثورة فى 52 وهى التى حاربت فى 73 وهى
التى عمرت بعد الحروب التى خاضتها مصر


بس دلوقتى بقت عاملة زى الجلابية
What is the meaning of Galabia?

الله يرحمه
هو مين
السيد جدك يا سيدى
مسمعتش عن الجلابية قبل كده
يقصد العباية يا سوسو
آه ما تقول العباية
المرحوم جدو الباشا كان بيحب يلبسها فى العزبة بتاعته
الجدو الباشا طيب ماعلينا

ايوه جلابية واسعة وفضفاضة بدرجة كبيرة لدرجة فكرتنى بأيام الجامعة
لما كان فى طلبة يقولك أنا جبت جيد
والتانى جيد مرتفع أو جيد شرطة
والتالت جيد مرتفع أو جيد شرطتين
فأصبحت الطبقة المتوسطة مشتتة المعالم غير واضحة
وقام أفراد هذه الطبقة بعمل تصنيف داخلى بينهم
وقد يرجع ذلك لأغراض نفسية أو لإشباع رغبات مكبوتة لبعض أفراد هذه الطبقة
والتصنيف ينقسم إلى ثلاثة أنواع
طبقة متوسطة
وهى القريبة من الطبقة العاملة
وقد تجد نفسها بين يوم وليلة من الطبقة العاملة نتيجة التغيرات الإقتصادية
طبقة متوسطة شرطة يعنى
اللى وقفت على السلم لا اللى فوق سمعوه ولا اللى تحت شافوه
يعنى لديها وفر يحمى بشكل أفضل أمام غول الأسعار
طبقة متوسطة شرطتين
وهى القريبة من الطبقة الغنية وتحاول رفع وصمة الطبقة المتوسطة من صحيفة الحالة الجنائية
ولكن يقعوا حيرى ما بين نظرة الإستعلاء من الطبقة الغنية تجاههم على أنهم طبقة متوسطة
وكراهية أفراد الطبقة المتوسطة تجاههم نتيجة محاولة
 التملص من الصداقات والعلاقات التى كانت موجودة بينهم البعض ولكن اصابها الفتور
الطبقة العاملة أصبحت حاليا تقع تحت خط الفقر فى ظل الإرتفاع الرهيب فى الأسعار
ولكن بما أنى من أبناء الطبقة المتوسطة فأسئلتى عن هذه الطبقة
 هل التحليل اللى أنا عامله ده مظبوط؟
هل فعلا لازالت الطبقة المتوسطة موجودة؟
ماهى المعالم المميزة لهذه الطبقة؟
***************************
تمت كتابة هذا الموضوع يوم 21/10/2010